Editor's choices of Myanmar Books

သီချင်းများ (စိုင်းခမ်းလိတ်) (အနုပညာ / ဖျော်ဖြေရေး)

ရှမ်းဘာသာနှင့် မြန်မာဘာသာ ကိုယ်ပိုင်သံစဉ် သီချင်းပုဒ်ရေ (၁၀၀၀) ကျော်နှင့် အင်္ဂလိပ်သီချင်း ပုဒ်ရေ (၄ဝ) ကျော်ကို ရေးစပ်ခဲ့သော တေးရေး စိုင်းခမ်းလိတ်၏ တေးသီချင်းပေါင်းချုပ်စာအုပ် ဖြစ်သည်။ ခံစားမှု သံစဉ်တေးများကို ရေးစပ်ရာတွင် အောင်မြင်ကျော်ကြားပြီး အဆိုတော် စိုင်းထီးဆိုင်နှင့် တွဲဖက်၍ တစ်ခေတ်ထူနိုင်ခဲ့သော စိုင်းခမ်းလိတ်၏ တေးသီချင်းများအားလုံးကို ဤတစ်အုပ်တည်းတွင် တစ်စုတစ်စည်းတည်း တွေ့ရှိရမည် ဖြစ်သည်။ သီချင်းများကို ရှာဖွေရ လွယ်ကူစေရန်အတွက် အက္ခရာစဉ်ကာ ဖော်ပြပေးထားသည်။ ဂီတာ Note များကိုလည်း ပြည့်ပြည့်စုံစုံ ထည့်သွင်းဖော်ပြထားသည်။

ဝတ္ထုတိုများ ပေါင်းချုပ် (အတွဲ ၁) (ခင်နှင်းယု) (ဝတ္ထုတို)

ဇာတ်လမ်း၊ ဇာတ်အိမ်ခံ့ညားစွာဖြင့် ရေးတတ်ပြီး စာဖတ်ပရိသတ်၏ အားပေးမှုကို အခိုင်အမာရရှိခဲ့သည့် ဆရာမကြီး ဒေါ်ခင်နှင်းယု၏ ဝတ္ထုတိုများကို စုစည်း၍ ဆရာမကြီး၏ ကဗျာများနှင့်တွဲဖက်ကာ ဝတ္ထုတိုပေါင်းချုပ်စာအုပ်အဖြစ် ထုတ်ဝေထားခြင်း ဖြစ်သည်။

ဘာသာပြန်သင်ခန်းစာများ (Lessons on Translation) (ဟိန်းလတ်) (ဘာသာစကား / ဘာသာဗေဒ)

ဘာသာပြန်စာပေနှင့် ပတ်သက်၍ နှစ်ပေါင်း (၅၀) ကျော်ကြာ အတွေ့အကြုံများ၊ သင်ခန်းပို့ချခဲ့သည်များ၊ ဖတ်ရှုလေ့လာခဲ့သည်များကို စာတွေ့‚ ကိုယ်တွေ့ ဘာသာပြန်နည်းစနစ်များ၊ ဘာသာပြန်အခြေခံပုံစံများ၊ ဘာသာပြန်ဆရာကြီးများ၏ လမ်းညွှန်ဩဝါဒများ၊ အင်္ဂလိပ်ဝါကျပုံစံများနှင့် မှားတတ်သော သဒ္ဒါပုံစံများ၊ နမူနာစံပြဝတ္ထု၊ ဆောင်းပါး၊ ကဗျာ၊ သတင်းဘာသာပြန်များကို အသေးစိတ် ရေးသားရှင်းလင်းထားသော စာအုပ်ဖြစ်သည်။

“အရေးစကားပြေ” အသုံးနဲ့ “အပြောစကားပြေ” အသုံးကို ပိုင်ပိုင်နိုင်နိုင် ခွဲခြား သုံးတတ်လိုသူတိုင်းအတွက် ရေးမယ်၊ ပြောမယ် (သုတေသီဆရာအေး) (ဘာသာစကား / ဘာသာဗေဒ)

မိမိရေးနေသည့်စာသည် “အရေးစကားပြေ” လား? “အပြောစကားပြေ”? ဆိုသည်ကို ခွဲခွဲခြားခြား သိမြင်ပြီး ကွဲကွဲပြားပြား ရေးနိုင်ရန် ရှင်းလင်းရေးသားထားသော စာအုပ်ဖြစ်သည်။ “အရေးစကားပြေ” နှင့် “အပြောစကားပြေ” ဘာကြောင့်ဖြစ်ရပုံနှင့် မှန်ကန်စွာသုံးနည်းကို မြန်မာအဘိဓာန်စာအုပ်ပါ တည်ပုဒ်များနှင့် ရှင်းလင်းပြဆိုထားပြီး တစ်မျိုးမှ တစ်မျိုးသို့ပြောင်းရာတွင် ခွဲခြားသုံးရသည့် စကားလုံးများကိုလည်း ဖော်ပြပေးထားသည်။

မိဘနှင့် သားသမီးကြား နှလုံးသားချင်း ဂျက်ပင်ထိုးနိုင်ကြစေရန်အတွက် ... ကျွန်တော်သိသော အမေများနှင့် တိုတိုထွာထွာ ဖတ်စရာများ (ညီညီ (စိတ်ပညာ)) (မိသားစုရေးရာ)

စာရေးသူ၏ မိခင်အကြောင်းနှင့်တကွ စာရေးသူ သိခဲ့ရသည့် အမေများအကြောင်း၊ ကလေးငယ်များ စိတ်ခံစားချက်၊ ကလေးပြုစုပျိုးထောင်ခြင်းဆိုင်ရာ အကြောင်းအရာများကို ဆောင်းပါးများခွဲ၍ ရေးသားမျှဝေထားခြင်း ဖြစ်သည်။

အပြုသဘောဆောင်သော စည်းကမ်းလိုက်စေမည့် နည်းလမ်းများ (မိဘ ဆရာ လက်စွဲ) (ဒေါက်တာသိန်းလွင် (ပါမောက္ခ (ငြိမ်း) ပညာရေးစိတ်ပညာဌာန ရန်ကုန်ပညာရေးတက္ကသိုလ်)) (မိသားစုရေးရာ)

ကလေးများကို ရေရှည်အကျိုးဖြစ်ထွန်းစေမည့် အပြုသဘောဆောင်သော စည်းကမ်းလိုက်စေမည့် နည်းလမ်းများအကြောင်း၊ ထိုနည်းလမ်းများနှင့် ပတ်သက်၍ မိဘအုပ်ထိန်းသူများ သိထားရမည့်အရာများ၊ ဆောင်ရန် ရှောင်ရန်များ၊ ၎င်းတို့ကို အကောင်အထည်ဖော်ရာတွင် ကလေးငယ်များ၏ စိတ်ခံစားမှု၊ ရုပ်ပိုင်းဆိုင်ရာ ပြောင်းလဲမှုများ၊ အကျိုးကျေးဇူးများကို ရှင်းလင်းရေးသားထားသော စာအုပ်ဖြစ်သည်။

ဝတ္ထုတိုများ ပေါင်းချုပ် (အတွဲ ၂) (ခင်နှင်းယု) (ဝတ္ထုတို)

လူငယ်တွေ မေးကြတဲ့ ထွေထွေရာရာ မြန်မာစာ (အတွဲ ၃) (မောင်ခင်မင် (ဓနုဖြူ)) (ဘာသာစကား / ဘာသာဗေဒ)

မြန်မာစကားပုံများ၊ မြန်မာစာပေ၊ မြန်မာဝေါဟာရ အဓိပ္ပာယ်၊ မြန်မာအက္ခရာ၊ စကားလုံးပေါင်း သတ်ပုံ၊ မြန်မာမှုများနှင့် ပတ်သက်၍ သံဃာတော်များ၊ ဆရာ, ဆရာမများ၊ ကျောင်းသားလူငယ်များ မေးကြသည့် မေးခွန်းများကို စာရေးသူသည် “မင်္ဂလာမောင်မယ်” စာစောင်၏ “မေးလိုရာရာ မြန်မာစာ”ကဏ္ဍတွင် ပြန်လည်ဖြေကြားခဲ့ရာ ၎င်းတို့အနက်မှ မေး, ဖြေ (၄၉) ပုဒ်ကို စုစည်း၍ စာအုပ်အဖြစ် စုစည်းထုတ်ဝေထားခြင်း ဖြစ်သည်။

ကန္တာရနှစ်များ (တင်မိုး) (ကဗျာ / အက်ဆေး / ပေးစာ / မိန့်ခွန်း / ဟောပြောချက်)

ရိုးသားဖြူစင်သော ခေတ်ပေါ်ကဗျာဆရာ၊ ပတ်ဝန်းကျင် လူ့အဖွဲ့အစည်းကို သစ္စာရှိစွာ ဖွဲ့နွဲ့သော ကဗျာဆရာဟု ဆရာဒဂုန်တာရာ ညွှန်းဆိုထားသည့် စာရေးသူ စပ်ဆိုသော ကဗျာလက်ရာ (၂၁၄) ပုဒ် ပါရှိသော စာအုပ်ဖြစ်သည်။

မြန်မာ့ရိုးရာ လူမှုရေးပဒေသာညွန့်ပေါင်း (အတွဲ ၁ + ၂) (ဓမ္မာစရိယ ဦးတင်မြင့်) (ယဉ်ကျေးမှု)

မြန်မာ့ ဓလေ့ထုံးတမ်းများဖြစ်သော (၃၈) ဖြာ မင်္ဂလာ၊ လောကီမင်္ဂလာ (၁၂) ပါးနှင့် (၁၆) ပါးအကြောင်း၊ ဖူးစာဖက်ရွေးနည်း၊ ထိမ်းမြားခြင်း (၁၀) ပါး၊ နာမည်ပေးကင်ပွန်းတပ် မင်္ဂလာ၊ အိမ်တက်, မွေးနေ့ မင်္ဂလာ၊ ပုခက်တင်မင်္ဂလာ၊ ရှင်ပြု နားသမင်္ဂလာ၊ ရဟန်းခံမင်္ဂလာ အစရှိသည့် မင်္ဂလာများအကြောင်း၊ ဗုဒ္ဓသာသနာနှင့် စပ်လျဉ်းသော ထူးခြားသည့် သမိုင်းဖြစ်ရပ်များ၊ မြန်မာ့သမိုင်းလာ ထင်ရှားသည့်ပုဂ္ဂိုလ်များအကြောင်း၊ မြန်မာ့ရိုးရာဓလေ့ပွဲများ၊ သာသနာနှင့် သမိုင်းတစ်လျှောက် ထူးခြားခဲ့သည့်ဖြစ်ရပ်များ၊ ရှေးနန်းတော်သုံး၊ ကျေးလက် တောရွာသုံး မြန်မာ့အချိန်နာရီများအကြောင်း၊ မြန်မာပြက္ခဒိန် သတ်မှတ်ချက်၊ ရက်ကန်းပညာ၊ မြန်မာ့ရိုးရာ ပန်း (၁၀) မျိုး အကြောင်းတို့ ပါရှိသည့် စာအုပ်ဖြစ်သည်။