Editor's choices of Myanmar Books

ဆရာတော်ဦးဗုဓ် (သခင်အောင်ဖေ) (အတ္ထုပ္ပတ္တိ / ကိုယ်တွေ့မှတ်တမ်း)

မြန်မာနိုင်ငံ ဗုဒ္ဓသာသနာသမိုင်းတွင် နေတစ်ဆူ သဖွယ် ထင်ရှားခဲ့သည့် ညောင်ကန် ဆရာတော်ဦးဗုဓ် (မယ်နုအုတ်ကျောင်းဆရာတော်)အကြောင်းကို ညောင်ကန်သာသနာဝင်ကျမ်းမှ ကိုးကားထုတ်နုတ် တင်ပြထားသော စာအုပ်ဖြစ်သည်။ ဘကြီးတော်မင်း လှူဒါန်းဆက်ကပ်သည့် ဘွဲ့တံဆိပ်တော်နှင့် ကျောင်းတော် လှူဒါန်းပွဲ၌ ဘကြီးတော်မင်းသည် ထိခြင်းငါးပါး မပြည့်စုံ၍ဟုဆိုကာ သီလမပေးဘဲ နှုတ်ဆိတ်နေခဲ့သည့် ဆရာတော်၊ ထိုပွဲ၌ပင် “မင်းနှင့် တူအောင်ကျင့်က ငါတို့ ဆုံးမ သြဝါဒပေးရန်မလို၊ မင်းနှင့်တူအောင် မကျင့်က ငါနှင့်မဆိုင်၊ အဝီစိနှင့်ဆိုင်တယ်”ဟု တိုင်းပြည်အုပ်ချုပ် မင်းလုပ်သူကို အတိုဆုံးတရားဟောခဲ့သူ၊ နန်းမတော်မယ်နု မင်းဒဏ်ကြောင့် ရေနစ်အသတ်ခံရနီးအချိန် ဆရာတော်က “မိနု၊ သူ့ကြွေးရှိရင် ဆပ်ရလိမ့်မယ်”ဟူသော အမိန့်ရှိခဲ့သူ၊ ဝမ်းကိုက်ရောဂါ ပြင်းထန်စွာ ခံစာနေချိန်မှာပင် ကုဋီထဲ၌ ခုဒ္ဒက ပါဠိတော် နိဿကျမ်းကြီးကို ပြီးမြောက်စေခဲ့သူ ဆရာတော်ဦးဗုဓ်၏ ထေရုပ္ပတ္တိကို ကြည်ညိုဖွယ် ဖတ်ရှုလေ့လာကြရမည်ဖြစ်သည်။

မင်းသုဝဏ်၏ လက်ရာစုံမင်းသုဝဏ် (မင်းသုဝဏ်) (အတ္ထုပ္ပတ္တိ / ကိုယ်တွေ့မှတ်တမ်း, ကလေးစာပေ, ကဗျာ / အက်ဆေး / ပေးစာ / မိန့်ခွန်း / ဟောပြောချက်, ဘာသာရေး, ဝတ္ထုတို)

ဆရာကြီး မင်းသုဝဏ် ရေးသားခဲ့သည့် ကဗျာ၊ ပြဇာတ်၊ ပုံပြင်၊ ဘာသာရေးဆောင်းပါး၊ အတ္ထုပ္ပတ္တိဆောင်းပါး၊ ဟောပြောချက်ဆောင်းပါး၊ ခရီးသွားဆောင်းပါး၊ အက်ဆေးများအနက်မှ ကောင်းနိုးရာများကို စုစည်း၍ စာအုပ်အဖြစ် ထုတ်ဝေထားခြင်း ဖြစ်သည်။

စီးပွားရေး အောင်မြင်ကျော်ကြားသူ ခေါင်းဆောင် ၁၀၀ ရဲ့ အကြောင်းနဲ့ သူတို့ရဲ့ အပြောများ (ကောင်းသာ) (အတ္ထုပ္ပတ္တိ / ကိုယ်တွေ့မှတ်တမ်း, သုတစာပေ)

Brilliant Business Mind and What They Said စာအုပ်ကို ဘာသာပြန်ဆိုထားခြင်း ဖြစ်သည်။ ကမ္ဘာ့ထိပ်တန်း စီးပွားရေးခေါင်းဆောင်များ၏ အတွေ့အကြုံ၊ တွေးခေါ်ပုံ၊ ယူဆချက်များ ထင်ဟပ်လျက်ရှိသည့် လက်ရွေးစင်အဆိုအမိန့်ကောက်နုတ်ချက်ကို သူတို့တစ်ဦးချင်းစီ၏ ဘဝနှင့် စွန့်ဦးတီထွင်လုပ်ဆောင်ချက်များနှင့်အတူ ဤစာအုပ်တွင် ဖတ်ရှုကြရမည် ဖြစ်သည်။

Speak English (Read before you go abroad) (နိုင်ငံခြားမသွားခင် ဒါဖတ်ဖြစ်အောင် ဖတ်ပါ) (စတီဗင်ဇာခိုင်) (ဘာသာစကား / ဘာသာဗေဒ)

မဟုတ်ဝါကျ မေးပုံ၊ အချိန်, ကိန်းဂဏန်း, လများ၏ အခေါ်အဝေါ်၊ နှုတ်ဆက်ပုံ၊ နိုင်ငံရပ်ခြားခရီးသွားရာ၌ ရန်ကုန်လေဆိပ်မှသည် မိမိသွားလိုသည့် နိုင်ငံ၏ လေဆိပ်သို့ ဆိုက်ရောက်သည့်တိုင်အောင် လူဝင်မှုကြီးကြပ်ရေးကောင်တာ၊ လေယာဉ်ပေါ်များ၌ ပြောဆိုပုံနှင့် လုပ်ထုံးလုပ်နည်းဆိုင်ရာ ရှင်းလင်းချက်၊ မိတ်ဆက်ခြင်း၊ စေးဝယ်ခြင်း၊ လမ်းမေးခြင်း၊ ရထားစီးခြင်း၊ သင်္ဘောဖြင့် သွားလာခြင်း၊ အလုပ်ရှာခြင်း၊ သွားဆေးခန်းပြခြင်း၊ ဖုန်းပြောခြင်း၊ သစ်သီး, အသား, ဟင်းလျာ, ငါး, အရောင်, ကျောက်မျက်, ကမ္ဘာ့နိုင်ငံအစရှိသည့် လေ့လာထားသင့်သည့် ဝေါဟာရများကို ပြည့်ပြည့်စုံစုံ ရှင်းလင်းထားသော စာအုပ်ဖြစ်သည်။ စကားပြောပုံစံတိုင်းကို အင်္ဂလိပ်တစ်ကြောင်း၊ မြန်မာအသံထွက်တစ်ကြောင်း၊ မြန်မာအဓိပ္ပာယ်ရှင်းလင်းချက်တစ်ကြောင်းဖြင့် ဖော်ပြထားသည့်အတွက် ဆရာလွတ်လေ့လာနိုင်မည့် စာအုပ်လည်း ဖြစ်သည်။

ရန်ကုန်အရေးပိုင်ဟောင်း မောရစ်ကောလစ်၏ ကမ္ဘောဇ နေဝင်ဘုရင်များ (ဦးခင်မောင်ကြီး (မိုးဝေ)) (ခရီးသွား / ပထဝီဝင်)

ရန်ကုန်အရေးပိုင်ဟောင်း မောရစ်ကောလစ်ရေးသားသည့် Lords of The Sunsetစာအုပ်ကို ဘာသာပြန်ဆိုထားခြင်းဖြစ်သည်။ ကိုလိုနီခေတ်က ရှမ်းပြည်နယ်သည် ဗြိတိသျှအင်ပါယာ၏ အရှေ့ဘက်အကျဆုံး နယ်ခြားအဖြစ်လည်းကောင်း၊ တရုတ်ပြည်၏ နောက်ဘက် တံခါးအဖြစ်လည်းကောင်း မဟာဗျူဟာမြောက် တည်ရှိလျက်ရှိသည်။ ထိုအချိန်က ရှမ်းပြည်တွင် တာဝန်ကျခဲ့သော ရှမ်းပြည်များ၏ မင်းကြီးအဖြစ်တာဝန်ထမ်းဆောင်လျက်ရှိသူ ဗြိတိသျှနိုင်ငံသား၏ ဖိတ်ကြားချက်အရ မူရင်းစာရေးသူ မောရစ်ကောလစ်သည် အင်္ဂလန်မှ ရှမ်းပြည်သို့ သီးသန့်ခရီးစဉ်အဖြစ် သွားရောက်လေ့လာခဲ့ရာ သူသိရှိခဲ့သည်များကို ရှုထောင့်စုံမှ မှတ်တမ်းတင် ရေးသားထားခြင်းဖြစ်သည်။ ရှမ်းပြည်၏ အလှအပများသာမက ရှမ်းလူမျိုးများအကြောင်း၊ ရှမ်းတို့၏ ထုံးတမ်းစဉ်လာဓလေ့များအကြောင်း၊ ရှမ်းစော်ဘွားများ၏ တန်ခိုးအာဏာ မည်သို့မည်ပုံ ကြီးထွားပုံ၊ ရှမ်းပြည်၏ သယံဇာတများအကြောင်း၊ လမ်းပန်းဆက်သွယ်ရေးနှင့် ခရီးသွားမြင်ကွင်းများကို စာရေးဆရာတစ်ဦးပီပီ နှိုက်နှိုက်ချွတ်ချွတ်လေ့လာကာ မှတ်တမ်းတင် ရေးသားထားသည်ကို တွေ့ရသည်။

လွယ်လွယ်ရှင်းရှင်း အင်္ဂလိပ်စကား (ဗမိုး) (ဘာသာစကား / ဘာသာဗေဒ)

ခရီးတစ်ခု စတင်ထွက်ခွာချိန်မှ စတင်ကာ ခရီးစဉ်ဆုံးသည်အထိ တွေ့ကြုံရမည့် လေဆိပ်တွင် ပြောဆိုပုံများ၊ ဟိုတယ်တွင် ပြောဆိုပုံများ၊ အစားအသောက် မှာကြားပုံများ၊ ဘဏ်နှင့် စာတိုက်တွင် ပြောဆိုပုံများ၊ ဖုန်းပြောဆိုပုံများ၊ စေးဝယ်ထွက် ပြောဆိုပုံများ အစရှိသည်တို့ကို အပြန်အလှန် စကားပြောဆိုပုံများဖြင့် ဤစာအုပ်တွင် လေ့လာကြရမည် ဖြစ်သည်။ စကားပြောပုံစံများကို စာကြောင်းအရှည်များ မသုံးထားဘဲ တိုတိုနှင့် လိုရင်းကို ထိထိမိမိပြောဆိုနိုင်မည့် ဝါကျတိုများကိုသာ သုံးစွဲထားသည့်အတွက် အချိန်တိုအတွင်း အင်္ဂလိပ်စာတိုးတက်မှု ရှိလာစေမည် ဖြစ်သည်။

သို့သော် ... ဦးကားမညွှတ် (မင်ဒဲလားနှင့် အားကစားပွဲတစ်ပွဲ၏ နိုင်ငံတော်တည်ထောင်ခဏ်း) (နေမင်းနိုင်) (သမိုင်း)

John Carlin ရေးသားသည့် Invictus စာအုပ်ကို ဘာသာပြန်ဆိုထားခြင်း ဖြစ်သည်။ တစ်ချိန်က ဖိနှိပ်ချုပ်ချယ်ခြင်း၊ အသားအရောင်ခွဲခြားခြင်း ခံခဲ့ရသည့် တောင်အာဖရိကလူမည်းတို့သည် လက်စားချေရန် အခွင့်အရေးကို ရခဲ့ကြသော်လည်း ၎င်းကိုမျက်ကွယ်ပြုကာ သူတို့၏ခေါင်းဆောင်ဖြစ်သော မင်ဒဲလား၏ ဦးဆောင်မှုနောက်ကို တစ်စိုက်မတ်မတ်လိုက်ခဲ့ကြသည်။ ယခုစာအုပ်တွင် လူဖြူတို့ အရူးအမူးစွဲလန်းခဲ့သည့် အားကစားတစ်ခု၊ သို့သော် အသားအရောင်ခွဲခြားရေးစနစ်ဆိုးကြီး၏ စက်ဆုတ်ရွံရှာဖွယ်ရာ သင်္ကေတစ်ခုလိုဖြစ်ခဲ့ရသည့် ရက်ဘီအားကစားကို မင်ဒဲလားက ဗဟိုပြု၍ အမျိုးသားရေးရင်ကြားစေ့ရေး ကြိုးပမ်းခဲ့ပုံလည်းကောင်း၊ အာဏာရလာသည့်တိုင် မင်ဒဲလားရင်ဆိုင်ခဲ့ရသည့် ရန်သူဝိုင်းနေသည့် ကွဲလွယ်ကြေလွယ် အခြေအနေနှင့် သူ၏ ထူးကဲလှသော နိုင်ငံရေးပါရမီအကြောင်းကိုလည်းကောင်း အသေးစိတ် မှတ်တမ်းတင် ရေးသားထားသည်။ ခွဲခြားဆက်ဆံခံရသည့် အဖိနှိပ်ခံဘဝမှသည် အားလုံးကို သင်ပုန်းခြေကာ ရန်သူကို မိတ်ဆွေဖြစ်အောင် လုပ်ခဲ့ကြသည့် တောင်အာဖရိက၏ အမျိုးသားရင်ကြားစေ့ရေးလမ်းစဉ်သည် နိုင်ငံတကာပဋိပက္ခဖြေရှင်းရေး လုပ်ငန်းလမ်းစဉ်တွင် လက်စွဲစာအုပ်ပမာ အသုံးပြုခဲ့ရသည့်အတွက် ဤစာအုပ်ကို ဘာသာပြန်ရခြင်းဖြစ်သည်ဟု ဘာသာပြန်ဆိုသူက ဆိုထားသည်။

အာရာဖတ်နှင့် ပါလက်စတိုင်းလွတ်မြောက်ရေး လှုပ်ရှားမှု (စိုးမြိုင်) (သမိုင်း)

ကမ္ဘာ့ဘာသာကြီးနှစ်ခုဖြစ်သည့် ခရစ်ယာန်ဘာသာနှင့် အစ္စလာမ်ဘာသာအပြင် ဂျူဒါဝါဒခေါ် ရဟူဒီဘာသာတရားပါ ပေါ်ထွန်းသည့် အချက်အချာနေရာဖြစ်သော အစ္စရေးမြေပေါ်တွင် ကိုယ်ပိုင်နယ်မြေရရှိရေးအတွက် တိုက်ပွဲဝင်ခဲ့သည့် အာရာဖတ်ဦးဆောင်သည့် ပါလက်စတိုင်းတို့၏ လွတ်မြောက်ရေး လှုပ်ရှားမှုများကို မှတ်တမ်းတင်ထားသော စာအုပ်ဖြစ်သည်။ ပါလက်စတိုင်းနောက်ခံသမိုင်း၊ မားလော့မြို့ အရေးအခင်း၊ လေယာဉ်ပြန်ပေးဆွဲမှု အပါအဝင် အကြမ်းဖက်မှုများကို ပါလက်စတိုင်းတို့ လုပ်ဆောင်ခဲ့ပုံ၊ အာရပ်ထိပ်သီးညီလာခံနှင့် အာရာဖတ်၊ သူ၏ PLO အဖွဲ့အကြောင်း အစရှိသည်တို့ကို အရှေ့အလယ်ပိုင်းနိုင်ငံရေးသမိုင်းကြောင်းနှင့်အတူ အခန်း (၁၅) ခန်းခွဲ၍ မှတ်တမ်းတင် ရေးသားထားသည်။

ဟင်နရီဖို့ဒ်ရဲ့ ဘဝနှင့် အလုပ် (အောင်လှိုင်) (အတ္ထုပ္ပတ္တိ / ကိုယ်တွေ့မှတ်တမ်း)

Henry Ford ရေးသားသည့် ကိုယ်တိုင်ရေးအတ္ထုပ္ပတ္တိ My Life And Work စာအုပ်ကို ဘာသာပြန်ဆိုထားခြင်း ဖြစ်သ ည်။ အမေရိကန်၏ အကြီးမားဆုံး စီးပွားရေးစွမ်းဆောင်ရှင် Henry Ford ၏ အောင်မြင်မှုအကြောင်းကို အားကျဖွယ် ဖတ်ရှုကြရမည့် စာအုပ်ဖြစ်သည်။ သူ့ဘဝ သူအကြောင်းနှင့်အတူ ၂ဝ ရာစုအစောပိုင်း အမေရိကန် စက်မှုလုပ်ငန်းဖြ စ်သည့် Ford Motor Company တို့ ပေါ်ပေါက်လာပုံ သမိုင်းကြောင်း၊ ကမ္ဘာ့အဆင့်မီလုပ်ငန်းတစ်ခုဖြစ်လာအောင် တွန်းပို့ခဲ့သည့် သူ၏ ဆန်းသစ်တီထွင်မှုများကို စာအုပ်တွင် အသေးစိတ် မှတ်တမ်းတင် ရေးသားထားသည်။

ငါ့ကိုယ်ငါ ပြောင်းလဲခြင်း (I'm changing myself) (အံ့ဘုန်းခန့်ကျော်) (သုတစာပေ)

ဘဝတွင် အခက်အခဲမျိုးစုံ တွေကြုံခဲ့ရသလို ပုံစံမျိုးစုံဖြင့် ကျော်ဖြတ်ပြီးနောက် ဂျပန်နိုင်ငံတွင် အခြေချ လုပ်ကိုင်လျက်ရှိသူ စာရေးသူက သူ၏ ဘဝအတွေ့အကြုံများ၊ အတွေ့အကြုံမှ ရလာသည့် အတွေးအမြင်များ၊ ကျင်လည်ရာ ဂျပန်လုပ်ငန်းခွင်အကြောင်း အစရှိသည်တို့ကို ဆောင်းပါးများခွဲ၍ ရေးသားမျှဝေထားခြင်း ဖြစ်သည်။