New Arrivals of Myanmar Books

လွမ်းရအောင် (မင်းလူ) (ဝတ္ထုရှည်)

‘မောင်အောင်စိမ်း’ နှင့် ‘ခင်မမ’ ခေါ် ‘မ’ တို့ကြားက မပြတ်နိုင်သည့် အတိတ်ဇာတ်လမ်းကို ဆရာမင်းလူ၏ ဟာသရေးဟန်ဖြင့် ဖတ်ရှုကြရမည် ဖြစ်သည်။

ဆရာတော်ဦးဗုဓ် (သခင်အောင်ဖေ) (အတ္ထုပ္ပတ္တိ / ကိုယ်တွေ့မှတ်တမ်း)

မြန်မာနိုင်ငံ ဗုဒ္ဓသာသနာသမိုင်းတွင် နေတစ်ဆူ သဖွယ် ထင်ရှားခဲ့သည့် ညောင်ကန် ဆရာတော်ဦးဗုဓ် (မယ်နုအုတ်ကျောင်းဆရာတော်)အကြောင်းကို ညောင်ကန်သာသနာဝင်ကျမ်းမှ ကိုးကားထုတ်နုတ် တင်ပြထားသော စာအုပ်ဖြစ်သည်။ ဘကြီးတော်မင်း လှူဒါန်းဆက်ကပ်သည့် ဘွဲ့တံဆိပ်တော်နှင့် ကျောင်းတော် လှူဒါန်းပွဲ၌ ဘကြီးတော်မင်းသည် ထိခြင်းငါးပါး မပြည့်စုံ၍ဟုဆိုကာ သီလမပေးဘဲ နှုတ်ဆိတ်နေခဲ့သည့် ဆရာတော်၊ ထိုပွဲ၌ပင် “မင်းနှင့် တူအောင်ကျင့်က ငါတို့ ဆုံးမ သြဝါဒပေးရန်မလို၊ မင်းနှင့်တူအောင် မကျင့်က ငါနှင့်မဆိုင်၊ အဝီစိနှင့်ဆိုင်တယ်”ဟု တိုင်းပြည်အုပ်ချုပ် မင်းလုပ်သူကို အတိုဆုံးတရားဟောခဲ့သူ၊ နန်းမတော်မယ်နု မင်းဒဏ်ကြောင့် ရေနစ်အသတ်ခံရနီးအချိန် ဆရာတော်က “မိနု၊ သူ့ကြွေးရှိရင် ဆပ်ရလိမ့်မယ်”ဟူသော အမိန့်ရှိခဲ့သူ၊ ဝမ်းကိုက်ရောဂါ ပြင်းထန်စွာ ခံစာနေချိန်မှာပင် ကုဋီထဲ၌ ခုဒ္ဒက ပါဠိတော် နိဿကျမ်းကြီးကို ပြီးမြောက်စေခဲ့သူ ဆရာတော်ဦးဗုဓ်၏ ထေရုပ္ပတ္တိကို ကြည်ညိုဖွယ် ဖတ်ရှုလေ့လာကြရမည်ဖြစ်သည်။

မင်းသုဝဏ်၏ လက်ရာစုံမင်းသုဝဏ် (မင်းသုဝဏ်) (အတ္ထုပ္ပတ္တိ / ကိုယ်တွေ့မှတ်တမ်း, ကလေးစာပေ, ကဗျာ / အက်ဆေး / ပေးစာ / မိန့်ခွန်း / ဟောပြောချက်, ဘာသာရေး, ဝတ္ထုတို)

ဆရာကြီး မင်းသုဝဏ် ရေးသားခဲ့သည့် ကဗျာ၊ ပြဇာတ်၊ ပုံပြင်၊ ဘာသာရေးဆောင်းပါး၊ အတ္ထုပ္ပတ္တိဆောင်းပါး၊ ဟောပြောချက်ဆောင်းပါး၊ ခရီးသွားဆောင်းပါး၊ အက်ဆေးများအနက်မှ ကောင်းနိုးရာများကို စုစည်း၍ စာအုပ်အဖြစ် ထုတ်ဝေထားခြင်း ဖြစ်သည်။

စီးပွားရေး အောင်မြင်ကျော်ကြားသူ ခေါင်းဆောင် ၁၀၀ ရဲ့ အကြောင်းနဲ့ သူတို့ရဲ့ အပြောများ (ကောင်းသာ) (အတ္ထုပ္ပတ္တိ / ကိုယ်တွေ့မှတ်တမ်း, သုတစာပေ)

Brilliant Business Mind and What They Said စာအုပ်ကို ဘာသာပြန်ဆိုထားခြင်း ဖြစ်သည်။ ကမ္ဘာ့ထိပ်တန်း စီးပွားရေးခေါင်းဆောင်များ၏ အတွေ့အကြုံ၊ တွေးခေါ်ပုံ၊ ယူဆချက်များ ထင်ဟပ်လျက်ရှိသည့် လက်ရွေးစင်အဆိုအမိန့်ကောက်နုတ်ချက်ကို သူတို့တစ်ဦးချင်းစီ၏ ဘဝနှင့် စွန့်ဦးတီထွင်လုပ်ဆောင်ချက်များနှင့်အတူ ဤစာအုပ်တွင် ဖတ်ရှုကြရမည် ဖြစ်သည်။

အစီအစဉ်မဲ့ခရီးသွား (Rackless Traveller) (အတွဲ ၂) (ရဲငွေစိုး) (ခရီးသွား / ပထဝီဝင်)

Punk Rock အပေါ် ရူးသွပ်၍ ၎င်းဂီတရေစီးကြောင်းထဲမှာ သီချင်းတွေဖန်တီး၊ JAM IT! ဆိုသည့်ပွဲများဖြင့် လူသိများခဲ့သည့် ဂီတလူငယ်တစ်ဦးဖြစ်သူ စာရေးသူက အစီအစဉ်မဲ့၊ ငွေအင်အားနည်းနည်းနှင့် သွားခဲ့သည့် ဗီယက်နမ်ခရီးစဉ်အကြောင်းကို မှတ်တမ်းတင်ထားသော စာအုပ်ဖြစ်သည်။ ကြိုတင်စီစဉ်ထားခြင်းမရှိဘဲ လွတ်လပ်စွာ ခရီးသွားလာရင် ရရှိခဲ့သည့် ခရီးသွားအတွေ့အကြုံများကို ပေါ့ပေါ့ပါးပါး မှတ်တမ်းတင် ရေးသားထားသည်။

မျိုးဆက်သစ် တိုးတက်ရစ်ဖို့ (အတွဲ ၂) (အောင်သင်း) (သုတစာပေ)

ခေတ်မြန်မာဂျာနယ်၊ စျေးကွက်ဂျာနယ်တို့တွင် ဆရာအောင်သင်းရေးသားခဲ့သည့် “မျိုးဆက်သစ်တို့ တိုးတက်ရစ်ဖို့” ဆောင်းပါးများကို စုစည်းထုတ်ဝေထားခြင်းဖြစ်သည်။ နိုင်ငံရေးသမား၊ ကျောင်းဆရာ၊ စာရေးဆရာအစရှိသည်ဖြင့် ဘဝပေါင်းများကို ကျင်လည်ဖြတ်သန်းခဲ့ဖူးသော ဆရာက ယနေ့ခေတ်လူငယ်များအား သွန်သင်ပြောပြလိုသည်များကို ဆောင်းပါးများအဖြစ် ရေးသားထားခြင်း ဖြစ်သည်။ ထို့ပြင် စာအုပ်ပါဆောင်းပါးများသည် ဆရာ၏ အတွေ့အကြုံများနှင့် အတွေးအကြံတို့ကို ယနေ့ခေတ်လူငယ်များသို့ လက်ဆင့်ကမ်းပေးသော ပညာပေးဆောင်းပါးများဖြစ်သည်ကိုလည်း တွေ့ရှိရမည်ဖြစ်သည်။ ခေတ်လူငယ်များ၏ လက်ရှိအခြေအနေ၊ အယူအဆများကို ပြောင်းလဲစေမည့် စာအုပ်ကောင်းဖြစ်သည်။

ဘိက္ခုပါကာရ - ရဟန်းတံတိုင်း (The Supreme Wall of the Monks) (ဘဒ္ဒန္တဝရဉာဏ (အမေရိကန်ဆရာတော်) (သာသနဓဇဓမ္မာစရိယ၊ ဝိနယာဓိကပရိယတ္တိဓမ္မာစရိယ၊ ပရိယတ္တိသာသနပါလဓမ္မာစရိယ)) (ဘာသာရေး)

စာသင်သား၊ စာချဆရာတော် စသည် ဘဝအခြေအနေမျိုးစုံကို ဖြတ်သန်းရင်း လက်ရှိအမေရိကန်နိုင်ငံတွင် သာသနာပြုလျက်ရှိသူ စာရေးသူက သင်ကြားရေး၊ သိမ်သမုတ်၊ အန္တရာယ်ကင်း ပရိတ်ရွတ်၊ ကမ္မဝါစာဖတ်၊ ကထိန်ခင်း၊ ဒုလ္လဘ ရဟန်း, ရှင်သာမဏေဝတ်ကိစ္စများ အပါအဝင် ရဟန်းပြုဖွယ် ကိစ္စအအသွယ်သွယ်ကို ဤတစ်အုပ်တည်းတွင် ကိုးကားဖတ်ရှုနိုင်အောင် စုံစုံစေ့စေ့ ဖော်ပြပေးထားသည်။

မြူများ ... ကြယ်များ ... လရောင်များ အက်ဆေးစုစည်းမှု (နိုင်ဝင်းသီ) (ကဗျာ / အက်ဆေး / ပေးစာ / မိန့်ခွန်း / ဟောပြောချက်)

ဆရာနိုင်ဝင်းသီ၏ စကားလုံးအနုပညာ အကောက်အနွဲ့များကို သဘောကျသူများ၊ အတိတ်နှင့် ပတ်ဝန်းကျင်အမှတ်တရများကို ရသနက်နက်နဲနဲဖြင့် ပြန်လည်ခံစားလိုများအတွက် အက်ဆေး (၁၆) ပုဒ် ပါရှိသည့် စာအုပ်ဖြစ်သည်။

အချစ်၊ အိမ်ထောင်ရေးနဲ့ ကတိကဝတ်တွေအကြောင်း ... ယောက်ျားတွေ တကယ်တွေးနေတဲ့အရာတွေ ... ပုရိသဋီကာ ယောက်ျားတို့အထာ (ဆောင်းသက်ငြိမ်) (လူမှုရေးနှင့် စိတ်ပညာ)

Steve Harvey ရေးသားသည့် Like a Lady, Think Like a Man: What Men Really Think About Love, Relationsh စာအုပ်ကို ဘာသာပြန်ဆိုထားခြင်း ဖြစ်သည်။ ချစ်တယ်လို့ ပြောတာနဲ့ တကယ်ချစ်တာက အတူတူပဲလား၊ ချစ်သူအဖြစ် တွဲနေတာနဲ့ ဘဝလက်တွဲဖော်အဖြစ် ရွေးချယ်တာကရော ဘာကွာလဲ၊ ယောက်ျားတစ်ယောက်က အိမ်ထောင်ပြုဖို့ ဆုံးဖြတ်တဲ့အခါ ဘာတွေကို စဉ်းစားတတ်လဲ အစရှိသည့် ပုရိသယောက်ျားများ၏ စိတ်ပိုင်းဆိုင်ရာ မေးခွန်းများ၏ အဖြေများ၊ ယောက်ျားတွေ အချစ်ရေးမှာ တကယ်လိုချင်တာများ၊ ရေရှည်လက်တွဲမှုနှင့် အိမ်ထောင်ရေးအပေါ် သူတို့ရဲ့အမြင်များ၊ ရင်းနှီးမှု၊ ကတိကဝတ်နှင့် ဆက်ဆံရေးဆိုင်ရာ သဘောထားများ၊ ကိုယ့်တန်ဖိုးကို မလျှော့ဘဲ အချစ်ရေးကို ရွေးချယ်တတ်ဖို့ အကြံဉာဏ်များကို ဖော်ထုတ်ရေးသားထားသော စာအုပ်ဖြစ်သည်။ ယောက်ျားများ၏ စိတ်ကို ပိုနားလည်ချင်သူများ၊ အချစ်ရေးမှာ ကိုယ်လိုချင်တဲ့အရာကို ရှင်းရှင်းလင်းလင်း သိချင်သူများ ဖတ်ရှုသင့်သည့် စာအုပ်ဖြစ်သည်။

ဆင်ခြင်ခြင်း၏ တန်ဖိုး (ဖြစ်ရပ်များနောက်က အတွေးအမြင်) (အရှင်သိရီဒတ္တာလင်္ကာရ (သုတရှင်) (ဒွိပိဋကဓရ၊ ဒွိပိဋကကောဝိဒ)) (ဘာသာရေး)

အခက်ခဲဆုံးစာမေးပွဲဟု ဆိုနိုင်သည့် တိပိဋကဓရ ရွေးချယ်ရေး စာမေးပွဲတွင် ငယ်ရွယ်သည့်အချိန်ကတည်းက ပိဋကနှစ်ပုံကို နှစ်မခြားဘဲ အာဂုံ ရေးဖြေ အောင်မြင်ခဲ့သူ စာရေးသူ ရေးသားသည့် ဘာသာရေးအတွေးအမြင်ဆောင်းပါးများ၊ ဘဝအတွေ့အကြုံဆောင်းပါးများ စုစည်းမှု စာအုပ်ဖြစ်သည်။